السلام عليكم و رحمة الله و بركاته
هاه و بعدين ؟!! .. ثلاث انفجارات حتي الان و قتيل و كام مصاب ... و بعدين ؟! ..اشتباكات كل كام يوم في الجامعات و قتل كام طالب بطريقة بشعة وواحد فجرتله دماغه هاه و بعدين ؟! .. الطلاب تاني يوم نزلوا جراج الجامعة و كسروا العربيات و حرقوها .. هاه و بعدين ؟!! عايزين نوصل لايه طيب ؟!! لسة مش مدركين ان القتل و الدم عمره ما حيحل قضية ... و ان نظرية قتل خصومك جميعا مش حيحل حاجة صح ؟!! ...
معلش بقي فيه نوعية من البشر لازم يفوقوا شوية ... تعالوا كده .. يوم فض رابعة انت فرحت صح و قلت نضفونا من الارهابيين ... و انت يالي هناك زعلت و عيطت و قلت ده اجرام و قلت علي الي برر لقتلهم ده مش انسان اساسا و ازاي يبرر القتل ...و لما حصل الانفجارات فرحت و قلت احسن ما هما مجرمين يروحوا في داهية .. و انت يالي كنت فرحان من شوية زعلت و قلت ازاي نبرر قتل جنودنا البواسل .. هو فيه حد ممكن يبرر عمل اجرامي كده و قرفت منه و قلت علي الي بيبرر ارهابي ... احب اقولكم انتوا الجوز .. انتوا نسختين من بعض .. انتوا وجه العملة و ضهرها .. بنفس تفكيركم الاسود و نفس عقولكم المريضة ... انتم انعكاس بعض في المراية .. مقلوب في المراية لكن في الاخر انتوا الاتنين نفس الشخص
اصل لو كده يلا نقتل في بعض بقي .. تقتلهم و يقتلونا و يلا بقي ... عاجبكم سوريا انتوا الجوز صح ؟! سلطة قمعت ثورة شعب و قتلوا ١٤ الف واحد و بعديها الشعب مسك السلاح و كله دخل يقتل في بعض .. و مبقاش فيه سوريا .. الدولة اتدمرت تماما .. كل فريق منكم عاجبه السيناريو ؟! كل واحد شايف من وجهة نظره ان فريقه علي حق و من حقه يدافع عنه بالسلاح و الدم و القتل ... و بعدين حنوصل لايه ؟! لخراب .. لدمار .. لفوضي ..
السلطة بالغباء الكافي انها تفتكر ان الاعتقالات اليومية و القتل المستمر و الانتهاكات علي كل صعيد حتقضي علي الارهاب ... و الجهة التانية فاكرة ان كام قنبلة و كام اغتيال حيدمروا الانقلاب و يخليه يركع ... نفس الفكر بنفس الغباء ... حريقة واحد بيحط فيها خشب و التاني بيزود عليها بنزين ... و مستنين ان بتصرف حد فيهم الحريقة بقدرة قادر تطفي
غياب العدل من السلطة اساس طبعا للي احنا فيه ... و التصرفات الصبيانية الغبية المجرمة من الناحية التانية لا تزيد الامر الا سوء.. دم بس بقي سهل .. و الناس اتعودت عليه .. وبقي طبيعي جدا تسمع كل يوم عن اعداد الي ماتوا و اتقتلوا و اتفجروا و غرقوا .. جميع الاصوات الي بتنادي بمزيد من القتل و الظلم و الانتهاكات لازم تخرس شوية ..ارحمونا كراهية .. ارحمونا ظلم و قتل و دم و استبداد .. ارحمونا تفجيرات و دم ناس ابرياء بيروح في الرجلين و مش حيحل حاجة .... استقيموا يرحمكم الله
No comments:
Post a Comment